मुख्य समाचारराजनीतिसमाचार

कांग्रेस सिद्धान्त र विधीबाट नभई एकलौटीरुपमा चलेकोे छ-पौडेल

कास्की । नेपाली कांग्रेसका वरिष्ठ नेता रामचन्द्र पौडेलले पार्टी सभापति शेर बहादुर देउवाले नेपाली कांग्रेसलाई एकलौटी रुपमा चलाएको ओराप लगाएका छन् । उनले पार्टीले सिद्धान्त तथा विधीलाई भूलेर व्यक्तिवादीरुपमा अघि बढाएको दुखेसो समेत गरे । पार्टी भित्र कार्यकर्ताको मूल्यांकन भन्दा पनि भागबण्डाको आधारमा अवसर दिने चलन गलत भएको समेत बताए ।

पोखरामा वीपी स्मृति पार्कको उदघाटन गर्दै बरिष्ठ नेता पौडेलले पार्टीलाई संस्थागत रुपमा र सिस्टममा चलाउन जरुरी भएको बताए । उनले भने,‘पार्टी सिस्टममा चलाउने हो भने भागबण्डा हुँदैन् । सिस्टममा नचलाउदाको परिणाम भागबण्डा हो ।’

वरिष्ठ नेता पौडेलले कांग्रेसले आफूलाई संस्थागत गरेर नेपाली जनतालाई लोकतन्त्रको सिद्धान्त र मर्मका बारेमा जानकारी बुझाउन अझै जरुरी रहेको पनि बताए । नेता पौडेलले जनताका बीचमा कांग्रेसलाई लोकप्रिय बनाउनका लागि कांग्रेसका नेता कार्यकर्ताले इमान्दार बन्ने जनताका  लागि काम गर्न जरुरी रहेको उल्लेख गरे ।

बरिष्ठ नेता पौडेलले कांग्रेसको शक्ती बामपन्थीहरुको जस्तो जनतालाई जबरजस्ती गरेर हासिल गरेको शक्ती नभएको भन्दै कांग्रेसले जनताको अन्तरआत्मालाई जित्न जरुरी रहेको समेत बताए । पार्टीलाई नयाँ ढंगले अगाडी बढाउनु पर्नेमा पौडेलको जोड रहेको थियो ।