काठमाडौँ ।
बिगत ७६ दिनदेखि आन्दोलनरत् नेपाल आंशिक प्राध्यापकसँग वार्ता गर्न शिक्षा मन्त्रालयले आइतबार वार्ता टोली गठन गरेको छ ।
लामो समयको आन्दोलनले पूर्णता नपाएको भन्दै असोज ११ गतेदेखि आंशिक प्राध्यापक डा. महेश कुमार गजुरेल आमरण अनशनमा बसेका थिए ।
शिक्षा मन्त्रालयका सहसचिव तथा योजना महाशाखाका प्रमुख डिल्ली रिमालको संयोजकत्वमा तीन सदस्यीय वार्ता समिति बनाइएको हो ।
वार्ता समितिको अन्य सदस्यहरुमा अर्थ मन्त्रालयका सहसचिव उत्तरकुमार खत्री र त्रिभुवन विश्वविद्यलायका योजना महाशाखा प्रमुख प्रा.डा. ऋदिश पोखरेल रहेका छन् ।
आंशिकलाई करार गरिनुपर्ने माग राखेर आमरण अनशनमा बसेका प्राध्यापकहरुको पीडालाई नजर गर्दै शिक्षा मन्त्रालयले वार्ताको लागि समिति बनाएको हो ।
अनशनकारी डा. गजुरेल १२ दिन देखि आमरण अनशनमा छन् । माग पूरा नभइन्जेल अनशन नतोडिने बताएपछि सरकारले वार्ताको लागि तदारुकता देखाएको हो ।
शिक्षा स्रोतले दिएको जानकारी अनुसार वार्ता समितिले सोमबारबाट औपचारिक छलफल गर्नेछ ।
