नवलपरासी । नेपाली कांग्रेसका महामन्त्री डा. शशांक कोईरालाले “अबको २० दिन मलाई दिनुस् ,५ बर्ष मात्रै नभई जीवन तपाईहरुको सेवामा सुम्पिन्छु भन्नुभएको छ । बर्दघाट सुस्ता पुर्व नवलपरासी निर्वाचन क्षेत्र न. १ को प्रतिनिधि सभा सदस्यका उम्मेदवार रहनुभएका कोईरालाले आफने निर्वाचन क्षेत्रको प्रचार प्रसारको क्रममा कार्यकर्ता माझं सम्बोधन गर्दै यस्तो बताउनुभएको हो ।
कोईरालालले नेपालको समृद्धि काँग्रेसकै नेतृत्वमा सम्भव रहेको बताउनुभयो । डा. कोइरालाले विगतको उपलब्धीलाई केलाउन मतदातालाई आग्रह गर्नुभएको छ । कोइरालाले भन्नुभयो “नेपाली काँगेसको नेतृत्वमा संविधान जारी भएको, काँग्रेसले नै लोकतन्त्र, स्वायत्त शासन र संविधानको बलियो जग निर्माण गर्न सदैव लडिरहेको सबैलाई थाहा भएकै कुरा हो ”। यस्तै काँग्रेसकै नेतृत्वमा संविधान संशोधनको प्रयास भएकोले नेपाली काँग्रेस सदैव संविधानको कार्यान्वयन र सबैको हितका लागि काम गरेको प्रष्ट पारेको बताउनुभयो ।
समृद्धिका पक्षमा भने कोइरालाको भनाई यस्तो रहेको थियो “ २०४८ सालमा ४९ प्रतिशतको गरिबीको रेखा २१ प्रतिशतमा झार्न सक्नु, ५० प्रतिशतको साक्षरता दर ९० प्रतिशतमा पु¥याउनु, ३६ प्रतिशतमा खानेपानीको सुविधा रहेकोमा अहिले ८४ प्रतिशतमा पुर्याउनु, नेपालमा दुर सञ्चारको सेवा ल्याउन पहल गर्नु, यसले देशको सामाजिक तथा आर्थिक क्षेत्रमा सहयोग पुर्याउएको छ ” । नेपाली काँग्रेसले दिएको विकासको प्रतिफल यही हो कोइरालाले बताउनुभयो ।