अजय कुमार झा, जनकपुरधाम । विगत दुई दिनलेखि बाक्लो कुहिरोसँगै शितलहर बढेपछि मध्य तथा पूर्वी तराई मधेशको जिल्लाहरुको जनजीवन प्रभावित बनेको छ ।

चिसो हावासँगै शितको वर्षा हुने गरेका कारणले चिसो अत्यधिक मात्रामा बढेको छ । बढेको चिसोका कारणले बिहान बेलुका बजारको चहल पहलमा व्यापक कमी आएको छ ।

बाक्लो कुहिरोका कारणले हिजोदेखि नै जनकपुर–काठमाडौं विमान सेवा अवरुद्ध रहेका छन् । जहाज अवतरणका लागि भिजिबिलीटि नभएका कारणले आज कुनै पनि जहाज नआएको जनकपुर विमानस्थलले जनाएको छ ।

चिसो हावासँगै जाढो बढेपछि बृद्ध, असक्त, अपाङ्ग, बालबालिकाहरु, दमका रोगीहरु पीडित भईरहेका छन् । उता चिसोका कारणले न्यानो, बाक्लो तथा उनी कपडाको विक्री वितरणमा व्यापक मात्रामा बृद्धि भएको छ ।

अत्यधिक चिसोको प्रभाव प्रदेश नं.२ को धनुषा, महोत्तरी, सर्लाही, सिरहा तथा सप्तरी सहितको जिल्लाहरुमा परेको छ । बाक्लो कुहिरोका कारणले तेलहन, दलहन बालीमा नकारात्मक असर पार्नुको साथै चौपायाहरु पनि प्रभावित हुन थालेका छन् ।