एजेन्सी । नेपाली समय अनुसार राती १० बजेर १५ मिनेट जाँदा डोनाल्ड जोन ट्रम्पले अमेरिकाको ४५ औं राष्ट्रपतिको रुपमा सपथ ग्रहण लिएका छन् । सर्वोच्च अदालतका प्रधानन्यायाधीश जोन रोबर्टस जुनियरले ७० वर्षीय ट्रम्पलाई पद तथा गोपनियताको सपथ खुवाएका हुन् । उक्त समारोह अमेरिकी कंग्रेस भवन क्यापिटोल हिलको पश्चिम क्षेत्रको अगाडिको भागमा आयोजित गरिएको थियो ।
उनले बायाँ हात बाईबालमा राख्दै सपथ लिएका थिए । निवर्तमान राष्ट्रपति बराक ओबामासँगै गाडीमा सवार हुँदै उनी ह्वाइट हाउसबाट सपथ ग्रहण स्थलमा पुगेका थिए ।
उनीसँगै उपराष्ट्रपति माइक पेन्सले पनि सपथ लिएका छन् । ट्रम्पभन्दा अघि उनलाई सर्वोच्च अदालतका न्यायाधीशले सपथ खुवाएका थिए ।
ट्रम्पले सपथ पछि आफूले अमेरिकालाई फेरी सम्पन्न बनाउने, रोजगारी तथा उद्योगलाई बढवा दिने प्रतिबद्धता गरेका थिए । उनले पहिले अमेरिका र अमेरिकी भन्ने नीतिलाई व्यवहारमा उतार्ने बताएका थिए । अब कुरा भन्दा काम गर्ने समय भएकाले नयाँ अमेरिका बनाउने कामको थालनि भएको उद्घोष गरे ।
