काठमाडौं । नेपाल तरुण दलको महाधिवेशन भएको साढे दुई महिना बितिसक्दा समेत कार्यसमितिले पूर्णता पाउन सकेको छैन् । पोखरामा भएको महाधिवेशनमा सहमतिका आधारमा अध्यक्ष जीतजङ्ग बस्नेत, उपाध्यक्षमा उत्तम चापागाईं, महासचिवमा भूपेन्द्रजङ्ग शाही र कोषाध्यक्षमा विद्वान् गुरुङ चयन गरिएको थिाय । बाँकी पदमा पूर्णता दिन ढिलाई भइरहेको छ ।
तरुण दलको महाधिवेशन सम्पन्न गर्न पार्टीले गठन गरेको निर्देशन समितिले महाधिवेशनबाट काठमाडौँ फर्केलगत्तै बैठक गरी कार्यसमितिलाई पूर्णता दिने निर्णय गरेको थियो । तरुण दलको चौथो महाधिवेशन गत कात्तिक २७ देखि २९ गतेसम्म पोखरामा भएको थियो ।
कार्यसमितिले पूर्णता नपाउँदा काम गर्न निकै गाह्रो भएको अध्यक्ष जीतजंग बस्नेतले बताए । उनले आफू र पदाधिकारी पनि थोरै भएकाले दैनिक कार्यक्रम तथा सङ्गठनका काम गर्न समस्या परेको गुनासो गरे । महाधिवेशनपछि तरुण दलमा कार्यसमिति कुल ९५ सदस्यीय हुनेछन् ।
बेलैमा कमिटिले पूर्णता नपाउँदा दैनिक तथा संगठनात्मक कठीनाई उत्पन्न भएको नेता तथा कार्यकर्ताहरुले बताएका छन् । तर पार्टी तथा निर्देशक समितिले भने कुनै चासो देखाएको छैन् ।
