काठमाडौं । नेपाल मानवअधिकार वर्ष पुस्तक प्रकाशन भएको २५ वर्ष पुगेको छ । यो पुस्तक प्रत्येक वर्ष प्रजातन्त्र दिवसको अवसरमा सार्वजनिक हुँदै आइरहेको छ । इन्सेकले यो पुस्तक सन् १९९२ देखि नियमित रुपमा प्रकाशन गर्दै आइरहेको अनौपचारिक क्षेत्र सेवा केन्द्र (इन्सेक) का अध्यक्ष सुबोध राज प्याकुरेलले जनाएका छन् ।
उक्त पुस्तक फागुन ७ मै काठमाडौं बाहिर विराटनगर, पोखरा, नेपालगञ्ज र धनगढीमा एकै समयमा सार्वजानिक भएको इन्सेकका कार्यकारी निर्देशक विजयराज गौतमले बताए ।
यस वर्षको पुस्तकमा सन् २०१६ मा देशभरी मानवअधिकार उल्लंघन तथा ज्यादतीका ४ हजार ५ सय २ घटनाहरुको तथ्यांक सहित विवरण समावेश गरिएको छ । र, यो वर्ष सबैभन्दा बढी महिला अधिकार उल्लंघनका घटनाहरु घटेको जनाएको छ ।
मानवअधिकार वर्ष पुस्तकमा ७५ ओटै जिल्लामा घटेका मानवअधिकार उल्लंघन तथा ज्यादतीको घटनाहरुलाई समावेश गरिन्छ । जसमा जिल्लागत तथ्यांक तथा घटनाहरु राखिएको छ ।
यस पुस्तकमा २५ वर्षको मानवअधिकारको समिक्षा तथा पुनरावलोकन गरिएको छ । यस पुस्तकलाई अनलाइनमा हेर्न तथा पढ्न सकिन्छ । यसका लागि http://www.inseconline.org मा लगअन गर्न सकिने इन्सेकले जनाएको छ ।
