सर्लाही । सर्लाहीको हरिपूर्बामा करेन्ट लागेर २ जनाको ज्यान गएको छ । घटनामा १ जना गम्भिर घाइते भएका छन् ।
प्रहरीका अनुसार जिल्लाको दक्षिण–पूर्वी क्षेत्र हरिपूर्वा नगरपालिका–९, बसन्तपुरको बगेबा गाउँ निवासी ३६ वर्षीय नरेन्द्र चौधरी र १४ वर्षीया सुनिता खत्वे मण्डलको मृत्यु भएको हो ।
स्थानीय २० वर्षीया फूलोदेवी महतो गम्भिर घाइते भएकी छिन् । उनको स्थानीय स्वास्थ्य केन्द्रमा उपचार भईरहेको ईलाका प्रहरी कार्यालय केशरगंजका प्रहरी निरीक्षक गौरव महतले जानकारी दिए ।
घरमा रहेको स्वीच अन गर्ने क्रममा उनीहरूलाई करेन्ट लागेको स्थानीयले बताएका छन् । ११ हजार भोल्टेजको हाईटेन्सन लाईनको तार खसेर घरमा वितरण गर्ने २ सय ४० भोल्टेजको तारमा छोएका कारण हाई भोल्टेज आउँदा स्वीच अन गर्ने क्रममै उनीहरुलाई करेन्ट लागेको बताईएको छ ।
प्रहरीले भने विस्तृतमा अनुसन्धान भईरहेकाले घटना के कसरी भयो भन्ने अहिले नै एकिन गर्न नसकिने जनाएको छ । विद्युत प्राधिकरणका कर्मचारी एवं स्थानियसँग बुझ्ने काम जारी रहेको प्रहरी निरीक्षक महतले जनाए ।
स्थानीय बासिन्दाका अनुसार उक्त क्षेत्रमा बिहानै देखि विद्युत प्राधिकरणको मर्मत संभार चलिरहेको थियो । प्राधिकरणको लापरवाहीका कारण घटना भएको भन्दै स्थानीयले विरोध जनाएका छन् ।