काठमाडौं । किसानका तात्कालिन र दिर्घकालिन समस्या समाधान गर्न माग गदै अखिल नेपाल किसान महासंघले जिल्ला प्रशासन कार्यालयमार्फत प्रधानमन्त्रीलाई ज्ञापन पत्र बुझाएको छ ।
बिहीबार महासंघले समयमा नै मल र बिउको आपूर्ति गर्नुपर्ने, सिंचाईलाई चाहिने विद्युतको सहुलियत शत प्रतिशत गर्नुपर्ने लगायका माग राख्दै काठमाडौंका प्रमुख जिल्ला अधिकारी जनकराज दाहाललाई ज्ञापन पत्र बुझाएको हो ।
महासंघले धानको समर्थन मूल्य तुरुन्त लागू गर्नुपर्ने, महंगीलाई नियन्त्रण गर्नुपर्ने, कोरोनाको उपचार सरकारले नै गर्नुपर्ने लगायका माग पनि अघि सारेको छ ।
त्यस्तै कृषि उत्पादनमा भइरहेको बिचौलिया प्रणाली बन्द गर्नुपर्ने र किसानको उत्पादित कृषि उपजहरुलाई राज्यले नै किन्ने व्यवस्था गर्नुपर्ने माग सहित प्रमुख जिल्ला अधिकारीमार्फत प्रधानमन्त्रीलाई ज्ञापन पत्र बुझाइएको महासंघ काठमाडौं जिल्लाका अध्यक्ष कृष्ण बहादुर गैरेले जानकारी दिए ।
ज्ञापन पत्र बुझ्दै प्रमुख जिल्ला अधिकारी दाहालले महासंघको मागलाई सम्बन्धित स्थानमा पुर्याउने प्रतिवद्धता जनाएका छन् । महासंघले आफूहरुका माग पुरा नभए कडा संघर्षमा उत्रने चेतावनी दिएको छ ।
