रातो रिबन, मीठो–नारा बजेटमा चाइने भो
सबैतिर छर्नलाई झण्डै पन्ध्र खर्ब पाइने भो
छिट्टै कोरोना हट्ने अरे नमर्ने रे बिरामी भई
सुलभ स्वास्थ्यको रागमा बजेटगान गाइने भो
निर्ब्याजी ॠण, अनुदान, मलबीऊ र रोजगारी
आफैंमा भर पर्न यो साल खेतीपाती लाइने भो
घटाए नि रोक्न हुन्न रे स्थानीयमा बाँडचुँड
विकास हेर्न मुख फेरि सांसदतिर बाइने भो
पोहोरझैं बढेकै छ खाडल खर्च-आम्दानीको
ढिकुटी भर्न उही धोक्रो लिई वरपर धाइने भो
-विनोद वावु
राप्ती–४, भण्डारा, चितवन (हाल- कलङ्की, काठमाडौं)