काठमाडौं । नेपाली कांग्रेसका नेता गगन थापाले डा. गोविन्द केसीमाथि प्रहरीले गरेको दुर्व्यवहार क्रुरताको पराकाष्ठा भएको बताएका छन् ।
डा. केसीलाई उनको इच्छा विपरीत प्रहरीले बल प्रयोग गरी राष्ट्रिय ट्रमा सेन्टरमा लगेपछि थापाले सामाजिक सञ्जालमार्फत यस्तो प्रतिक्रया दिएका हुन् ।
‘सत्याग्रहीमाथिको दुर्व्यवहारः क्रुरताको पराकाष्ठा ! सत्याग्रहीलाई इच्छा विपरीत छुन पनि पाईंदैन । अनसनरत डा. गोविन्द केसीमाथि सरकारले गरेको अपमानजनक व्यवहार लोकतन्त्रमा अकल्पनीय र अक्षम्य छ,’ थापाले ट्विटरमा लेखेका छन्, ‘क्रुर तानशाहले मात्र यस्तो निन्दनीय कृत्य गर्नसक्छ । सरकारले आफ्नो पतनको बाटो आफै खनेको छ ।’