काठमाडौं । र्याप गायक भिटेन अर्थात् समिर घिसिङलाई पक्राउ नगर्न उच्च अदालत पाटनले अन्तरिम आदेश जारी गरेको छ। मुख्य न्यायाधीश नहकुल सुवेदीको इजलासले गीतसंगीतको विषयलाई लिएर पक्राउ नगर्न आदेश दिएको पाटन उच्च अदालतका प्रवक्ता शम्भुप्रसाद रेग्मीले जनाएका छन् ।
अन्तरिम आदेशले रोक्न माग गर्दै भिटेन उच्च अदालत पाटन पुगेका थिए। रिटमाथि सुनुवाइ गर्दै मंगलबार प्रहरीका नाममा उच्च अदालत पाटनले अन्तरिम आदेश जारी गरेको हो।
प्रहरी प्रधान कार्यालयले गएको बिहीबार उनीबिरुद्ध साइबर ब्युरोलाई चिठी लेखेको थियो।
भिटेनले एक साताअघि युट्युबमा पोस्ट गरेको र्यापको भिडिओमा आपत्तिजनक शब्द प्रयोग भएपछि कारबाही गर्न बिहीबार साइबर ब्युरो भोटाहिटीलाई चिठी लेखेको थियो ।
यूट्युबमा भिटेनले यसपटक ‘पारा’ शीर्षकमा नयाँ भिडिओ सार्वजनिक गरेका थिए। पछि उनले हाइड गरेका थिए ।
भिटेनलाई महानगरीय अपराध महाशाखाले आपत्तिजनक शब्द तथा चित्र बोकेको भिडिओ सार्वजनिक गरेको आरोपमा केही समय अघि पक्राउ गरेको थियो।
प्रहरीले भिटेनले र्याप गाउँदा शब्द चयन गर्दा नेपाली समाज तथा संस्कृति बिरुद्ध रहेको जनाएको छ । सोही आधारमा उनीमाथि कारबाही अघि बढाए पनि उच्च अदालतको अन्तरिम आदेशपछि पक्राउ गरिने छैन् ।
