भारतमा केन्द्र सरकारले हालै ल्याएका तीन कृषि कानून खारेजीको माग गर्दै प्रदर्शन गरिरहेका किसान संगठनहरुले डिसेम्बर ८ का दिन भारत बन्दको घोषणा गरेका छन् । दिल्ली चलो अन्दोलन अन्तर्गत पञ्जाब र हरियाणासहितका राज्यका किसान अहिले राजधानी दिल्लीका विभिन्न सीमा नाकामा बसेका छन् । सुरक्षाकर्मीले उनीहरुलाई दिल्ली पस्न दिएका छैनन् ।

आफ्ना माग पूरा नगरे डिसेम्बर ८मा दिल्लीका सबै टोलहरु घेराउ गर्ने किसान संगठनले बताएका छन् । भारतीय किसान युनियनका नेता गुरमान सिंह चढूनीले शनिबार हुने वार्तामा केन्द्र सरकारले आफूहरुको माग पूरा नगरेमा आन्दोलन थप तीव्र र सशक्त बनाउने बताएका छन् ।

पछिल्लो ९ दिनदेखि पञ्जाब, हरियाणासहितका राज्यबाट आएका किसान दिल्लीका विभिन्न सीमा क्षेत्रमा धर्नामा छन् । आन्दोलनरत किसान र सरकारबिच शनिबार पाँचौँ चरणको वार्ता हुँदैछ । यसअघि बिहीबार विज्ञान भवनमा चौथो चरणको वार्ता भएको थियो, जुन निष्कर्ष बिहीन बनेको थियो ।

अहिलेसम्मका वार्तामा कुनै पनि विषयमा सहमति भएको छैन । बिहीबारको वार्तामा किसानका ४० प्रतिनिधिले संसदको विशेष सत्र बोलाएर तीन कृषि कानून फिर्ता लिन आग्रह गरेका थिए ।

नयाँ कृषि कानून किसान विरोधी रहेको र ती कानूनले ठूला व्यवसायिक घरानालाई फाइदा गर्ने किसानको भनाई छ । तर सरकारले भने नयाँ कानूनले किसानलाई नयाँ अवसर प्रदान गर्ने दाबी गर्दै आएको छ ।