काठमाडौँ । गायक बेदु सारु मगरको नयाँ म्युजिक भिडियो ‘तिमी निष्ठुरी हौ’ सार्वजनिक भएको छ । सेण्टिमेण्टल भर्सनमा ल्याइएको यो गीतमा प्रेमपछिको वेदनालाई प्रस्तुत गर्न खोजिएको छ । यो सेण्टिमेन्टल गीत गायक मगर र दिनेश सुवेदीले सयुक्त रुपमा लेखेका हुन् । गीतमा गायक मगरकै संगीत रहेको छ । दिक्षीत पौडेलले गीतलाई संगीत संयोजन गरेका छन् ।

प्रेम जोडी बीचको बिछोडको कथा समेटिएको नयाँ म्युजिक भिडियोमा सुधिर श्रेष्ठ र रोशनी कार्की फिचर्ड छन् । भिडियोलाई पवन सुस्लिङ्गले छायांकन र सम्पादन गरेका हुन् । सिता पोख्रेल निर्मात्री रहेको यस भिडियोलाई स्वोर्निम थापाको कन्सेप्ट र निर्देशनमा तयार पारिएको हो ।

गायक मगरको आधिकारिक च्यानल ‘बेदु सारु मगर’ मार्फत भिडियो सार्वजनिक गरिएको छ । भोइस अफ टिनको उपाधि समेत हात पारिसकेका गायक मगरले यसअघि ‘डोली पियारी’, ’तिमी नै त हौ’ लगायतका थुप्रै गीतहरु सार्वजनिक गरिसकेका छन् । गायक मगरले भर्खरै सार्वजनिक नयाँ भिडियोलाई दर्शक स्रोताबाट सकारात्मक प्रतिक्रिया आइरहेको बताएका छन् ।