काठमाडौं । नेपाल चिकित्सक संघले आमरण अनसनमा रहेका डा. गोविन्द केसीको माग ७२ घण्टा भित्र पूरा नगरे देशभरीको स्वास्थ्य सेवा ठप्प पार्ने चेतावनी दिएको छ । मंगलबार प्रधानमन्त्री केपी शर्मा ओलीलाई भेटेर ध्यानाकर्षण गराएको संघले उक्त चेतावनी दिएको हो ।
संघका अध्यक्ष डा. मुक्तिराम श्रेष्ठले सरकारले दिएको अल्टिमेटम भित्र डा. केसीको माग सुनुवाई नभए इमर्जेन्सी बाहेकका सबै सेवा ठप्प पार्ने बताएका छन् । उनले सरकारले आफ्ना मागको बारेमा गम्भिर नभए कठीन अवस्था आउन सक्ने चेतावनी समेत दिएका छन् । उनले आफूहरुको माग डा.केसी जीवन रक्षा मात्र रहेको पनि स्पष्ट पारेको छ ।
सरकार डा. केसीको स्वास्थ्य अवस्था गम्भिर हुँदा पनि चासो नदिएको प्रति गुनासो गर्दै सरकार गम्भिर हुन आग्रह गरेका छन् । आफूहरु डा. केसीको ज्यान जोगाउन कडा भन्दा कडा कदम चाल्न तयार रहेको जनाएका छन् । डाक्टरहरुले बिरोधमा विगत ४ दिनदेखि हातमा कालो पट्टी बाँधेर काम गरिरहेका छन् ।
डा. केसी जुम्लामा आमरण अनसन बसिरहेका छन् । उनले माथेमा आयोग तथा विगतको सरकारले ल्याएका अध्यादेश पारित गर्नु पर्ने लगायतका मागहरु राखेर आमरण अनसनमा बसिरहेका छन् ।
