काठमाडौं । नेपाली कांग्रेसका सभापति शेर बहादुर देउवाले नेपाली कांग्रेस संसदीय दलका उपनेता विजय कुमार गच्छदारलाई उपसभापतिमा नियुक्त गरेका छन् । उनले पार्टीको केन्द्रीय समितिको बैठक अघि उक्त निर्णय गरेका हुन् ।

नेपाली कांग्रेसको वर्तमान विधानमा एक जना उपसभापतिको मात्र व्यवस्था गरिएको छ । तर राजनीतिक आवश्यकताको आधारमा गच्छदारलाई उपसभापतिमा नियुक्ति गरिएको कांग्रेस देउवाको सचिवालयले जनाएको छ । यसअघि बिमलेन्द्र निधीलाई उपसभापतिमा मनोनयन गरिसकेको छ ।

पछिल्लो पटक नेपाली कांग्रेसको आन्तरिक राजनीतिमा सभापति देउवालाई एक्लाउन खोजिएकोले आफ्रनो गुट बलियो बनाउन देउवाले नयाँ चाल चलेको बताइएको छ । पछिल्लो समय महामन्त्री सशांक कोइराला, वरिष्ठ नेता रामचन्द्र पौडेल, केन्द्रीय सदस्य प्रकाशमान सिंह तथा कृष्ण सिटौला समूह पनि देउवाको विपक्षमा उभिदै आइरहेको छ । यसले देउवालाई आन्तरिक पार्टीमा कमजोर बनाएको छ ।

महामन्त्री पूर्ण बहादुर खड्का पनि देउवासँग नरहेको एक जना देउवा निकट नेताले जनाए । साथै निधीको दरो भरोशा नभएकाले गच्छदारलाई अघि सारिएको उक्त श्रोतले जनाएको छ । गच्छदार आफै चतुर नेताका रुपमा चिनिन्छन् ।

गच्छदार नियुक्तिसँगै मधेश तथा तराईमा पनि शक्ति सन्तुलन हुने बुढानिलकण्ठ श्रोतले जनाएको छ । मधेशमा निधीको मनलाग्दी रोक्नका लागि पनि गच्छदार उपयुक्त र सक्षम नेता रहेको देउवाको बुझाइ रहेको जनाइएको छ ।