संस्कृतिविद, वाङमय शताब्दी पुरुष, महाविद्यावारिधि सत्यमोहन जोशीसंग नेपालका लागि चिनियाँ राजदुत होउ यान्छीले भेटघाट गरेकी छन् ।
शुक्रबार ललितपुरको बखुम्बहालस्थित संस्कृतिविद, वाङमय शताब्दी पुरुष सत्यमोहन जोशीको निवासमै पुगेर भेटघाट गरेकी हुन् ।
१०० वर्षे जीवनयात्रामा रहेका शताब्दी पुरुष जोशीलाइ भेटेर राजदुत यान्छीले संस्कृतिविद सत्यमोहन जोशीले नेपाल चीन मित्रतामा पुर्याएको योगदानको स्मरण गर्दै चिनियाँ नागरिकले कहिल्यै नबिर्सने बताएकी छन् ।
उनले नेपाल–चीन सम्बन्धलाई चिरस्थायी बनाइ राख्नका लागि जोशीकोे पदचाप पछ्याउन नयाँ पुस्तालाई आह्वान पनि गरिन् ।
सन् १९६० मा सत्यमोहन जोशी नेपाली भाषा पढाउन पेकिंग ब्रोडकास्टिङ इन्सटिच्युटमा गएका थिए । उनले सन् १९७० मा चिनियाँ अन्तर्राष्ट्रिय रेडियोमा नेपाली विशेषज्ञको रुपमा कामसमेत गरेका थिए ।
चीन बसाइको क्रममा उनले नेपाली कलाकार अरनिको बारेमा अनुसन्धान गरेका थिए । अरनिको सम्बन्धी ऐतिहासिक तथ्यमा आधारित रहेर अरनिको ह्वाइट प्यागोडा ग्यालरी काठमाडौंको कीर्तिपुरमा पनि स्थापना गरेका छन् ।
कुराकानीका क्रममा राजदूत यान्छीले जोशीलाई चीन भ्रमणका लागि प्रस्ताव गरेकी थिइन्। तर, संस्कृतिविद् जोशीले आफ्नो स्वास्थ्य अवस्था र उमेरका कारण भ्रमणका लागि असमर्थ रहेको भन्दै अस्वीकार गरे।
भेटका क्रममा राजदूत यान्छीले संस्कृतिविद् जोशीको सुस्वास्थ्य एवं दीर्घजीवनको कामनाका साथै मायाको चिनो प्रदान गरेकी थिइन्।
