काठमाडौं । प्रमुख विपक्षी दल नेपाली कांग्रेसका सभापति शेरबहादुर देउवाले पार्टीका तर्फबाट विजयी स्थानीय तहका जनप्रतिनिधिलाई हिँडेर गन्तव्यमा गइरहेका नागरिकलाई खाना खुवाउन निर्देशन दिएका छन् ।
सभापति देउवाले शुक्रबार ट्वीट गर्दै समस्यामा परेका मजदुर र अति विपन्न परिवारहरूलाई खाना र खाजासहितको व्यवस्था गर्न निर्देशन दिएका हुन् ।
काठमाडौंलगायत जिल्लाबाट नागरिकहरू हिँडेरै घर गइरहेको र खाना–खाजा नपाएर अलपत्र परेपछि सभापति देउवाले खाना, खाजा र बसोबासको व्यवस्था मिलाउन निर्देशन दिएका छन् ।
‘लकडाउनको कारण काठमाडौंलगायत विभिन्न क्षेत्रबाट खाना र बस्ने व्यवस्था नभएर पैदलै घर गइरहेका नागरिकहरूलाई नेपाली कांग्रेसका स्थानीय तह र पार्टीको भातृ तथा शुभेच्छुक संस्थाका साथीहरूले सामाजिक दूरी कायम गरी आ–आफ्नो क्षेत्रमा खाना र राति भए बासको प्रवन्ध मिलाउन म आग्रह गर्दछु’, सभापति देउवाले भनेका छन् ।
सरकारले पर्याप्त राहत दिन नसक्दा दैनिक ज्यालामजदुरी गरि खाने मजदुरहरू हिँडेरै गन्तव्यमा गइरहेको कांग्रेसले बताएको छ ।
देउवाले सरकार निमुखालाई सहयोग गर्नतिर भन्दा दर्शकमात्रै भएर बसेको पनि आरोप लगाएका छन् ।