नेपालमा कोरोना संक्रमणबाट मृत्यु हुनेको संख्या ४ पुगेको छ ।
स्वास्थ्य तथा जनसंख्या मन्त्रालयले सोमबार आयोजना गरेको नियमित पत्रकार सम्मेलनमा प्रवक्ता डा विकास देवकोटाले बाराको कलैयाका ७० वर्षिय वृद्धको मृत्यु भएको दिएका छन् ।
मृतक वृद्धको स्वाव परीक्षण गर्दा कोरोना पोजेटिभ देखिएको प्रवक्ता देवकोटाले बताए । स्वास प्रश्वासमा समस्या देखिएपछि जेठ २ गते अस्पताल भर्ना गरिएको थियो । आइसियुमा उपचारकै क्रममा रहेका उनको ३ गते स्वाव संकलन गरी नारायणी अस्पतालमा परीक्षण गर्दा पोजेटिभ देखिएको थियो ।
राष्ट्रिय जनस्वास्थ्य प्रयोगशाला टेकुमा गरिएको पुनः परीक्षणमा पनि पोजेटिभ देखिएपछि उनको कोरोनाबाट मृत्यु भएको मन्त्रालयले पुष्टि गरेको हो । मृतक वृद्धको सम्पर्कमा आएकाहरुको जेठ ५ गते स्वाव संकलन गरी परीक्षण गरिएकोमा ६ जनामा संक्रमण पोजेटिभ देखिएको उनले बताए । यसअघि सिन्धुपाल्चोक, बाँके, गुल्मीका एक एक जनाको मृत्यु भएको थियो ।
यसैबीच, नेपालमा कोरोना संक्रमितको संख्या ६ सय नाघेको छ । सोमबारसम्म पीसीआर विधिबाट ५१ हजार ६ सय ४२ र आरडिटी विधिबाट ९५ हजार १ सय ९२ जनाको नमुना परीक्षण गरिएको छ । पछिल्लो २४ घण्टामा पीसीआर विधिबाट २ हजार ९ सय ४ र आरडिटी विधिबाट ५ हजार १ सय ६६ वटा नमुना परीक्षण भएका छन् । सम्मेलनमा व्यवस्थापना महाशाखाका निर्देशक भोग्रेन्द्रराज डोटेलले विभिन्न जिल्ला प्रदेशलाई १८ हजार भिटिएम वितरण गरिसकेको र १२ हजार मौज्जाद रहेको बताए ।
त्यसैगरी २ लाख ५ हजार भिटिएम खरिद गर्नका लागि खरिद प्रक्रियाका अगाडि बढाएको उनले जानकारी दिए ।