बाजुरामा मृत्यु भएकी दुई वर्षीया बालिकालाई कोरोना भाइरसको संक्रमण पुष्टि भएको छ ।
स्वास्थ्य तथा जनसंख्या मन्त्रालयको नियमित पत्रकार सम्मेलनमा मन्त्रालयका प्रवक्ता डा. विकास देवकोटाले मार्तडीस्थित जिल्ला अस्पतालको आइसोलेसनमा उपचारका क्रममा आइतबार मृत्यु भएकी बालिकाको कोरोना रिपोर्ट पोजेटिभ देखिएको बताएका छन् ।
सेती प्रादेशिक प्रयोगशालामा स्वाब परीक्षण गर्दा उनमा कोरोना संक्रमण देखिएको हो । सुदूरपश्चिम प्रदेशमा कोरानाबाट ज्यान गएको यो पहिलो घटना हो । यससँगै कोरोनाबाट नेपालबाट मृत्यु हुनेको संख्या ८ जना पुगेको छ ।
यसैबिच, नेपालमा आइतबार थप १ सय ६६ जनामा कोरोना संक्रमण देखिएको छ । तनहुँका एक जना, स्याङ्जाका दुई जना, पर्साका ५ जना, कालीकोटमा १३ जना, दैलेखका १८ जना, बाजुरामा एक जना, सल्यानका २५ जना, सुर्खेतका एक जना, कपिलवस्तुका एक जना, बाँकेका ८ जना, सप्तरीका १२ जना, कैलालीका तीन जना, बाजुराका २ जना, झापाका ४ जना, मोरङका एक जना, धनुषाका २१ जना, कपिलवस्तुका ४ जना, रौतहटका २९ जना र सर्लाहीका १० जनामा कोरोना संक्रमण पुष्टि भएको मन्त्रालयले जनाएको छ । योसँगै कोरोना संक्रमितको संख्या १ हजार ५ सय ६७ पुगेको छ ।
त्यस्तै देशभर एक लाख १९ हजार १ सय ९२ जना क्वारेन्टाइनमा रहेका मन्त्रालयले जनाएको छ । त्यस्तै अस्पतालमा उपचारतको संख्या १ हजार ३ सय ४९ पुगेको छ भने डिस्चार्ज हुनेको संख्या २ सय २० पुगेको छ । त्यसमध्य १ सय ७२ पुरुष र ४८ महिला छन् ।