नेपालमा कोरोना भाईरस संक्रमणबाट थप एक जनाको मृत्यु भएको छ ।
पाल्पाका पूर्वखोला गाँउपालिकाका ४५ वर्षीय पुरुषको कोरोना संक्रमणबाट मृत्यु भएको स्वास्थ्य मन्त्रालयका प्रवक्ता डा. विकास देवकोटाले जानकारी दिनएका छन् ।
भारतबाट पाँच दिन अघि आएका उनी क्वारेन्टाइनमा रहेकामा स्वास्थ्यमा समस्या आएपछि मिसन अस्पताल भर्ना गरिएको थियो । उनको जेठ २० गते निधन भएको र स्वाव परीक्षणमा कोरोना पोजेटिभ देखिएको प्रवक्ता देवकोटाले जानकारी दिए । योसँगै कोरोना संक्रमणबाट मृत्यु हुनेको संख्या दश पुगेको छ ।
त्यस्तै पछिल्लो २४ घण्टामा ३ सय ३४ कोरोना संक्रमित थपिएका छन् । योसँगै कोरोना संक्रमितको संख्या २ हजार ६ सय ३४ पुगेको छ ।
मन्त्रालयका अनुसार अहिले सम्म कुल ८४ हजार १ सय ३४ पीसीआर टेस्ट र १ लाख २५ हजार ५ सय ६४ आरडीटी परीक्षण भएको छ । पछिल्लो २४ घण्टामा ३ हजार ८ सय ६७ पीसीआर परीक्षण र ५ हजार १ सय ८५ आरडिटी परीक्षण गरिएको छ ।
अहिले सम्म २ सय ९० जना डिस्चार्ज भएका छन् । पछिल्लो २४ घण्टामा नारायणी अस्पताल विरगंजबाट ५ जना र कलैया अस्पतालबाट ७ जनागरी १२ जना संक्रमित निको भइ डिस्चार्ज भएका छन् ।