काठमाडौं । मन्त्रिपरिषद् बैठकले लकडाउनलाई खुकुलो बनाउने विषयमा कार्ययोजना बनाउन उच्चस्तरीय समितिलाई जिम्मेवारी दिएको छ ।
बिहीबार प्रधानमन्त्री निवास बालुवाटारमा बिहीबार भएको बैठकमा लकडाउन खुकुलो बनाउने विषयमा छलफल भएपनि ठोस निर्णय भने भैनसकेको बताइएको छ ।
लकडाउन खुकुलो कसरी गर्ने भन्ने विषयमा कार्ययोजना बनाउन उच्चस्तरीय समितिलाई जिम्मेवारी दिइएको एक मन्त्रीले जानकारी दिएका छन् । समितिले बनाएको कार्ययोजनाका आधारमा मन्त्रिपरिषद्ले थप निर्णय गर्ने जनाइएको छ । सरकारले पछिल्लो पटक लम्ब्याएको लकडाउनको अवधि आगामी जेठ ३२ गतेसम्म छ ।
शुरुमा एक साताका लागि भनेर चैत ११ मा घोषणा गरिएको बन्दाबन्दी त्यसयता लगातार कायम राख्दा सर्वसाधारणको जनजीवन कष्टकर हुन थालेको छ । यसले बन्दाबन्दीको स्वरुप्प परिवर्तन गर्न सरकारमाथि चौतर्फी दबाब बढेको छ । सरकारले लकडाउनको स्वरुप परिवर्तन नगरेको भन्दै व्यवसायीले बिहीबारदेखि बजार पसल खोल्न थालिसकेका छन् ।
