काठमाडौं । डिआइजी नवराज सिलवालले प्रहरी महानिरीक्षक बनाउदा सरकारले अन्याय गरेको भन्दै उनले सर्वोच्चमा रिट निवेदन दायर गरेका छन् । उनले सरकारले गैरकानुनीरुपमा प्रकाश अर्याललाई प्रहरी महानिरीक्षकमा बढुवा गरेको जनाउँदै आफूलाई महानिरीक्षक बनाउन माग गरी मंगलबार सर्वोच्च अदालतमा रिट निवेदन दायर गरेका हुन ।
निवेदनमा चार वर्षको कार्यसम्पादन मूल्यांकनमा आफूले २६३ र प्रकाश अर्यालले २६२ अंक प्राप्त गरेको हुँदा आफू कार्यसम्पादन र मूल्यांकनमा अगाडि भएको उल्लेख छ ।
सिलवालले प्रधानमन्त्री तथा मन्त्रिपरिषदको कार्यालय, प्रधानमन्त्री, गृह मन्त्रालयलगायतलाई विपक्षी बनाइ दायर गरिएको निवेदनमा आफूलाई प्रहरी महानिरीक्षकमा बढुवा पाउने कानुनप्रदत्त हकमाथि आघात सिर्जना भएको हुँदा मन्त्रिपरिषदको सोमबारको निर्णय बदर गरी आफूलाई प्रहरी महानिरीक्षक बनाउन माग गरिएको छ ।
यसअघि प्रहरी महानिरीक्षकमा जयबहादुर चन्दलाई सरकारले बढुवा गरेपछि सो कार्यान्वयन नगराइ आफूलाई वरिष्ठताका आधारमा प्रहरी महानिरीक्षक बनाउन माग गर्दै उनीद्वारा दायर गरिएको निवेदनमा अदालतले चार वर्षको कार्यसम्पादन र मूल्यांकनका आधारमा वरिष्ठतमलाई बढुवा गर्न आदेश दिएको थियो ।
