नेपाली कांग्रेसका नेता कृष्णप्रसाद सिटौला समूहमा आबद्ध विद्यार्थी नेताहरूले संगठन सदृढ बनाउन आग्रह गरेका हुन् ।
बूढानिलकण्ठस्थित पार्टी सभापति शेरबहादुर देउवालाई भेटेर उनीहरुले तत्काल नेविसंघको तदर्थ समिति बनाउन माग गरेका हुन् ।
सिटौला समूहमा आबद्ध एउटा खेमा ३२ वर्षमुनिबाटै तदर्थ समिति ल्याउनुपर्ने माग राख्दै अनशनमा बसिरहेका बेला अर्को खेमाका विद्यार्थीहरूले देउवालाई सहमतिका आधारमा तदर्थ समिति बनाउन आग्रह गरेको हो ।
नेविसंघ विघटन भएको झन्डै १ वर्ष पुग्नै लाग्दा पनि तदर्थ समिति गठन नहुनु संगठन र मातृ पार्टीका लागि दुर्भाग्य भएको जिकिर गर्दै नेता तपेन खड्काले केन्द्रीय कार्यसमिति नहुँदा संगठन भताभुंग भएको, सरकारविरुद्ध मुद्दा उठाउन नसकिएको गुनासो सभापति देउवालाई सुनाएको जानकारी दिए ।
जवाफमा सभापति देउवाले नेविसंघको तदर्थ समिति गठनकै लागि आफूले केन्द्रीय कार्यसमितिमा प्रस्ताव पेस गरिसकेको र पुस १० गते बस्ने बैठकमा छलफल गरिने बताएका छन् ।
