अमेरिकामा कोरोनाभाइरसबाट सङ्क्रमित हुनेको सङ्ख्या १० लाख नाघेको छ ।
विश्वभर सङ्क्रमितमध्ये करिब एक तिहाई सङ्क्रमण अमेरिकामा देखिएको कोरोनाभाइरसको विश्वव्यापी रूपमा तथ्याङ्क सङ्कलन गरिरहेको वल्डोमिटरले जनाएको छ । कोरोनाका कारण हालसम्म अमेरिकामा ५९ हजार २ सय ६६ जनाको मृत्यु भएको छ भने १० लाख ३५ हजार ७ सय ६५ जना संक्रमित भईसकेका छन् ।
यस्तै, विश्वभर संक्रमित हुनेको संख्या ३१ लाख ३८ हजार १ सय १५ पुगेको छ । कोरोनाका कारण हालसम्म २ लाख १७ हजारभन्दा बढीको मृत्यु भइसकेको छ ।
अमेरिकी राष्ट्रपति डोनल्ड ट्रम्पले आफूहरूले धेरैभन्दा धेरै परीक्षण गरेकाले यो सङ्ख्या देखिएको बताएका छन् । उनले विस्तारै सङ्क्रमितको सङ्ख्या शून्यमा झर्ने बताए। ट्रम्पले गत फेब्रुअरीमा पनि अमेरिकामा कोभिड १९ को सङ्क्रमण शून्य हुने बताएका थिए ।
त्यसबेला अमेरिकामा कोरोनाभाइरसका १५ वटा मात्र सङ्क्रमण भेटिएका थिए । ब्रिटेनमा बुधवारबाट केयर होमहरूमा भर्ती भएका सबै मानिसहरू र त्यहाँका कर्मचारीहरूको कोरोनाभाइरस सङ्क्रमण परीक्षण हुँदैछ । सङ्क्रमणको कुनै पनि लक्षण नदेखिएकाहरूमा पनि यो परीक्षण हुनेछ । यसले लाखौँ मानिसहरूलाई परीक्षणको दायरमा ल्याउने बताइएको छ ।
यस्तै, फ्रान्समा मे ११ बाट लकडाउन खुकुलो पारिनेछ । तर त्यहाँ सार्वजनिक यातायात र विद्यालयहरूमा मास्क लगाउन अनिवार्य गरिएको छ ।
