काठमाडौं । स्वास्थ्य तथा जनसंख्या मन्त्रालयले एक वक्तव्य जारी गर्दै नेपालमा कोरोना भाइरसको नयाँ भेरियन्ट पत्ता लागेको जानकारी दिएको छ । मन्त्रालयले जारी वक्तव्यमा भनिएको छ, देशका विभिन्न भागबाट गत हप्ता संकलित ३५ नमुनालाई विश्व स्वास्थ्य संगठनको समन्वयमा जिन सिक्वन्सिङ गरी प्राप्त नतिजा अनुसार ९७ प्रतिशतमा ९३४ वटामा बी.१.६१७.२ नयाँ भेरियन्ट र ३ प्रतिशतमा बी.१.६१७.१ भेरियन्ट पुष्टि जानकारी दिएको छ ।

नेपालमा यो परिवर्तित भाईरस सहित तीन किसिमका भेरियन्ट रहेको जनाएको छ । विश्व स्वास्थ्य संगठनले २०२१ मे १० मा यो नयाँ भेरियन्टलाई विश्वव्यापी भेरियन्ट अफ कन्सर्न भनी घोषणा समेत गरिसकेको उक्त वक्तव्यमा उल्लेख गरिएको छ ।

नयाँ भाइरस सबै उमेर समूहमा धेरै संक्रामक र जोखिमपूर्ण रहेको जनाएको छ । र सबै सचेत रहन पनि आह्वान गरिएको छ ।