काठमाडौं । भुटानले अनुदानमा दिएको एस्ट्राजेनेकाको तीन लाख डोज खोप नेपाल आइपुगेको छ । भुटानको थिम्पुबाट तीन लाख खोप बोकेर उडेको ड्रुक एयरलाइन्सको जहाज केही समयअघि त्रिभुवन अन्तर्राष्ट्रिय विमानस्थलमा ओर्लेको हो ।
भुटानले आफ्ना नागरिकलाई पूर्ण खोप लगाइसकेपछि बाँकी खोप नेपाललाई अनुदान सहयोग गरेको हो । भुटानको जनसंख्या आठ लाख छ । भुटानले दिएको खोप यसअघि कोभिसिल्डको पहिलो मात्रा लगाएका जेष्ठ नागरिकलाई लगाइने सरकारले जनाएको छ ।
यसैगरी, भोलि शनिबार जापानबाट एस्ट्राजेनेकाको आठ लाख डोज खोप नेपाल आउँदैछ । जापानले नेपाललाई उपलब्ध गराउने भनेको १६ लाख डोजमध्ये पहिलो खेप शनिबार र दोस्रो खेप आइतबार नेपाल आइपुग्ने छ ।
जापान र भुटानले दिएको १९ लाख डोज एस्ट्राजेनेकाको खोप आएपछि १३ लाख जेष्ठ नागरिकलाई आगामी साताबाटै लगाइने भएको छ ।
