काठमाडौं । चीन सरकारले नेपाललाई थप १६ लाख डोज कोभिड– १९ विरुद्धको खोप अनुदानमा दिने भएको छ । शुक्रबार बिहान प्रधानमन्त्री शेरबहादुर देउवालाई बधाइ दिन चिनियाँ राजदूत होउ यान्छीले गएकी थिइन् । सो अवसरमा थप खोप अनुदान दिने औपचारिक जानकारी गराएकी हुनु ।

परराष्ट्र मन्त्रालयले भेटका क्रममा राजदूत यान्छीले थप १६ लाख डोज भ्याक्सिन अनुदानमा नेपाललाई उपलब्ध गराउने निर्णय चीन सरकारले गरेको जानकारी गराएको बताएको छ । प्रधानमन्त्री देउवाले खोप सहयोगका लागि धन्यवाद दिँदै कोभिड–१९ नियन्त्रण तथा न्यूनीकरणका लागि चिनियाँ सरकारबाट थप सहयोग पाइने विश्वास व्यक्त गरेका हुन् ।

प्रधानमन्त्री नियुक्त भएको ४ दिनपछि चिनियाँ रावदूत यान्छी देउवालाई भेट्न शुक्रबार सरकारी निवास बालुवाटार पुगेकी हुन् । प्रधानमन्त्री देउवा र चिनियाँ राजदूत यान्छीबीचको शुक्रबारको भेटमा चीन–नेपाल सम्बन्धका बहुआयामिक पक्षबारे छलफल भएको परराष्ट्र मन्त्रालयले जनाएको छ ।