काठमाडौं । हिमालपारिको जिल्ला मनाङ र मुस्ताङका १८ वर्षमाथिका सबै नागरिकले कोभिड–१९ विरुद्धको खोप लगाएका छन् । जिल्लाभित्रका १८ वर्ष पूरा गरेका सबै नागरिकले कोभिड–१९ विरुद्धका खोप लगाएका हुन् । अहिलेसम्म नौ हजार ५ सय ८ जना नागरिकले पूरा मात्रा खोप लगाइसकेका छन् ।

अब १८ वर्ष माथिका नागरिकहरु खोप लगाउन छुटेका छैनन् । भेरोसेल खोप पहिलो डोज लगाएका २४२ दोश्रो डोज लगाउन बाँकी भए पनि लक्ष्यित वर्ग सबै खोपको दायरामा आइसकेका छन् । मुस्ताङमा हाल सम्म ५१८ जनामा कोभिड–१९ संक्रमण पुष्टि भएकोमा अहिले २० जना सक्रिय संक्रमित छन् ।

मुस्ताङमा कोभिड को संक्रमणबाट अहिलेसम्म १५ जनाको मृत्यु भएको छ । हालसम्म मुस्ताङभित्र पिसिआर बिधिबाट २२३ जनाको परिक्षण गर्दा ११२ जनामा र एन्टीजेन बिधिबाट २ हजार ७ सय १७ जनाको परिक्षण गर्दा ४०६ जनामा कोभिड–१९ पोजिटिभ पाइएको थियो ।