काठमाडौँ । नेपाली महिलाहरुको महान पर्व हरितालिका तीज नजिकिँदै गीत निकाल्ने होड त्यत्तिकै चलेको छ । त्यसै सन्दर्भमा ख्यातिप्राप्त अभिनेत्री करिश्मा मानन्धरले पनि तीज गीतको म्युजिक भिडियो तयार गरेकी छन् ।
केबी फिल्म्सको प्रस्तुतीमा ‘आउन संगी हो, गाउँन मिलेर’ बोलको तीज गीतको म्युजिक भिडियो तयार पारिएको हो । गायिका मेलिना राईको सुमधुर स्वर सजिएको उक्त गीतमा साज सिंहको संगीत निर्देशन रहेको छ । त्यसैगरी गीतका शब्दहरु कोरियोग्राफर गोविन्द राईले रचना गरेका छन् ।
गोविन्द राईकै कोरियोग्राफी तथा निर्देशनमा सो गीतको भिडियो तयार पारिएको हो । सो गीत केही दिनमै करिश्मा मानन्धरकै यूट्युब च्यानलबाट सार्वजनिक हुँदै छ । उक्त गीतको भिडियोमा अभिनेत्री करिश्मा मानन्धरले आकर्षक नृत्य गरेकी छिन् ।
भिडियोमा करिश्मासँगै सम्झना बुढाथोकी, क्षितिजा शाक्य, तेन्जु योञ्जन, सुप्रिया योञ्जन, बसु तामाङलाई पनि फिचर गरिएको छ । मदन काश्यप घिमिरेद्वारा छायांकन गरिएको उक्त गीतको भिडियोलाई नहकुल खड्काले सम्पादन गरिरहेका छन् ।