काठमाडौं । गत शुक्रबार सार्वजनिक तीज गीत ‘कुरा बुझ्न पर्च’ युट्युब ट्रेन्डिङको शीर्ष स्थानमा दर्ज भएको छ । ‘प्रकाश सपुत’ युट्युब च्यानलबाट सार्वजनिक गरिएको उक्त गीतको म्युजिक भिडियोले २१ लाख बढी ‘भ्यूज’ प्राप्त गरेको छ ।
गायक तथा सर्जक प्रकाश सपुतको रचना÷संगीत रहेको उक्त गीतमा गायिका शान्तिश्री परियार र समीक्षा अधिकारीेको सुमधुर स्वर सजिएको छ । गीतको भिडियो निर्देशन पनि गायक सपुतले नै गरेका हुन् । भिडियोमा कलाकार स्वस्तिमा खड्का, आँचल शर्मा, लक्ष्मी गिरी, कालु राना, कमला रेग्मी, अनिता बस्नेत र सुनील विकको अभिनय रहेको छ ।
अभिनेत्रीद्वय खड्का र शर्मालाई नायिकाको रुपमा उभ्याइएको छ । अहिले सपुतको उक्त गीत युट्युब ट्रेन्डिङको पहिलो स्थान ओगट् सफल भएको छ । उनले गीतमा महिलाको आत्मसम्मान र स्वतन्त्रताको विषयलाई खरो रुपमा उजागर गरेको बताइन्छ ।
समाजमा घटेका विविध घटनालाई आफ्ना सिर्जनामा मुखरित गर्न पोख्त उनको गत वर्ष सार्वजनिक तीज गीत ‘बदला बरीलै’ पनि युट्युब ट्रेन्डिङमा पहिलो स्थान ओगट्न सफल भएको थियो ।
उक्त गीतको म्युजिक भिडियोलाई हालसम्म युट्युबमा ८६ लाखभन्दा बढी पटक हेरिएको थियो । बागलुङको काठेखोला गाउँपालिका–३ धम्जामा जन्मिएका सुपतका यसअघि सार्वजनिक ‘बोलमाया’, ‘गलबन्दी’, ‘फुटेका चुरा’ ‘दोहोरी ब्याटल’ लगायतका गीतहरु चर्चाको शिखर चुम्न सफल छन् ।
गायक सुपत र गायिका शान्तीश्री परियारद्वारा स्वरबद्ध ‘गलबन्दी’ले त चार करोड ७१ लाखभन्दा बढी भ्यूज बटुलेको थियो । तीज पर्व नजिकिएसँगै तीजका विभिन्न भाका युट्युबमा भरिभराउ हुन थालेका छन् । अडियो क्यासेट, सिडीको जमाना गएपछि संगीतकर्मीलाई युट्युबको माध्यम निर्विकल्प बनेको छ ।