काठमाडाैं । आफ्नो अन्तिम खेलमा नेपालले भारतविरुद्ध टस हारेको छ । सुपर सिक्स अन्तर्गतको अन्तिम खेलमा टस हारेसँगै नेपाल सेमिफाइनल नजिक रहेको भारतविरुद्ध पहिले फिल्डीङ गर्ने भएको छ । भारतले केहीबेरपछि पहिले ब्याटिङ गर्नेछ ।

दक्षिण अफ्रिकामा जारी आईसीसी यू-१९ विश्वकप क्रिकेटको प्रतियोगितामा नेपाल सुपर सिक्सका खेल खेल्नु अगावै प्रतियोगिताबाट बाहिरिएको थियो । यद्यपि, पहिलो खेलमा नेपाल बंगलादेशसँग ५ विकेटले पराजित भएको थियो । भारत अपराजित रहँदै ३ खेलमा ६ अंकका साथ शीर्ष स्थानमा छ । भारत नेपालविरुद्ध झिनो अन्तरले हारेपनि सेमिफाइनल पुग्ने सम्भावना रहेको छ ।

विश्वकपमा नेपाल र भारतबीच यो तेस्रो पटक प्रतिस्पर्धा हुन लागेको हो । यसअघि नेपाल सन् २००० मा ८ विकेट र २०१६ मा ७ विकेटले पराजित भएको थियो । नेपालले आफ्नो इतिहासमा भारतलाई २०१७ को यू-१९ एसियाकपमा पहिलो पटक हराएको थियो । तर त्यसपछि भने नेपालले भारतलाई हराउन सकेको छैन ।