अमेरिकी राष्ट्रपति डोनाल्ड ट्रम्पले इतिहासमै पहिलोपटक अमेरिकाका ५० वटै राज्यमा संकटकाल घोषणा गरेका छन् ।
ट्रम्पले राष्ट्रपतीय अधिकार प्रयोग गर्दै कोरोना भाइरसविरुद्धको लडाईंलाई थप प्रभावकारी बनाउन सोमबार ५० वटै राज्यमा पूर्णरुपमा संकटकाल लगाउने प्रस्तावमा हस्ताक्षर गरेका हुन् । यो लकडाउनकै स्वरुप हो । अब मानिसहरु बाहिर हिँडडुल गर्न पाउने छैनन् ।
ट्रम्पले आफूहरु अहिले एउटा अदृश्य शत्रुसँग युद्ध गरिरहेको ट्वीटरमा उल्लेख गरेका छन् । उनले आफूहरु जित्ने दाबी समेत गरेका छन् । अमेरिकामा कोरोना भाइरसबाट सबैभन्दा धेरै २२ हजार १ सय १५ जनाको मृत्यु भएको छ भने ५ लाख ६० हजार बढी संक्रमित छन् । विश्वभर कोरोना भाइरसबाट मृत्यु हुनेको संख्या १ लाख १५ हजार २ सय २४ रहेको छ भने १८ लाख ६५ हजार बढी संक्रमित छन् ।
यसैबीच दक्षिण कोरियाले संयुक्त राष्ट्र अमेरिकालाई ६ लाख थान नोभेल कोरोना भाइरस परीक्षण किट सहयोग गर्ने भएको छ । अमेरिकी राष्ट्रपति डोनाल्ड ट्रम्पले परीक्षण किट सहयोगको आह्वान गरेपछि दक्षिण कोरियाले मंगलबार पहिलो चरणमा ६ लाख किट पठाउन लागिएको रोयटर्सले उल्लेख गरेको छ ।
