नेपालमा कोरोना संक्रमितको संख्या ४२ पुगेको स्वास्थ्य तथा जनसंख्या मन्त्रालयले जनाएको छ ।
मंगलबार उदयपुरमा थप ११ जनामा संक्रमण पुष्टि भएपछि नेपालमा कोरोना संक्रमितको संख्या ४२ पुगेको स्वास्थ मन्त्रालयले बिज्ञप्ती मार्फत पुष्टी गरेको हो ।
उदयपुरबाट संकलन गरिएको स्वाव नमुना परीक्षणलाई राष्ट्रिय जनस्वास्थ्य प्रयोशाला टेकुमा परीक्षण गर्दा पोजेटिभ देखिएको हो । उदयपुरको त्रियुगा नगरपालिकामा कोरोना संक्रमण परिक्षण गर्दा राष्ट्रिय जनस्वास्थ्य प्रयोगशालामा २ जना र धरानको बीपी कोइराला स्वास्थ्य विज्ञान प्रतिष्ठानमा ८ जनामा कोरोना संक्रमण पुष्टि भएको स्वास्थ्य तथा जनसंख्या मन्त्रालयले जनाएको हो ।
यस्तै अहिलेसम्म मुलुकभर ३६ हजार ७ सय १९ वटा नमुना परीक्षण भएका छन् । पिसिआर विधिबाट ८ हजार ७ सय ६३ र आरडिटी विधिबाट २७ हजार ९ सय परीक्षण भएको मन्त्रालयका प्रवक्ता बिकाश देवकोटाले जानकारी दिए ।
प्रदेश नम्बर १ मा आरडिटी विधिबाट २ हजार ६ सय २०, प्रदेश नम्बर २ मा ३ हजार ५ सय ९८ र बागमती प्रदेशमा ५ हजार १ सय ५७ नमुना परीक्षण भएका छन् । यस्तै गण्डकी प्रदेशमा ४ हजार १ सय ८३, प्रदेश नम्बर ५ मा २ हजार ४ सय ८३ कर्णाली प्रदेशमा ३ हजार ७ सय ३८ र सुदुरपश्चिममा ६ हजार १ सय ७७ परीक्षण भएको प्रवक्ता देवकोटाले जानकारी दिए ।
अहिले देशभरी नै क्वारेन्टाइनमा ७ हजार ६७ जना रहेका छन् । उपत्यकामा ६ जना र उपत्यका बाहिर १ सय १ गरी १ सय ७ जना आइसोलेसनमा रहेका छन् । यसैबीच सुदूरपश्चिमका पहिलो कोरोना संक्रमित ३४ वर्षिय युवक मंगलबार साँझ उपचार पछि निको भएर घर फर्किएका छन् । यो सँगै नेपालमा निको हुनेको संख्या ५ पुगेको छ । धनगढी उपमहानगरपालिका–५ घर भएका उनी ३० दिनअघि अस्पताल भर्ना भएका थिए ।
