काठमाडौं । सत्ता गठबन्धनमा रहेका प्रमुख तीन दलका स्थानीय नेताहरुले बञ्चरेडाँडामा काठमाडौं महानगरको फोहोर विसर्जन गर्न अवरोध गरेका छन् । नेपाली कांग्रेसका धुनिवेंशी नगरपालिकाका सभापति पूर्ण तामाङ, माओवादी केन्द्रका नगर अध्यक्ष विष्णु तामाङ र एकीकृत समाजवादी पार्टीका नगर अध्यक्ष भीषण धितालले आइतबार संयुक्त विज्ञप्ति जारी गरेसँगै सोमबारबाट फोहोर विसर्जनमा अवरोध भएको हो ।
ती दलहरुले आइतबार संयुक्त रुपमा विज्ञप्ति जारी गरेका थिए । जसका कारण फोहोर बोकेर काठमाडौं उपत्यकाबाट बञ्चरेडाँडा जान लागेका गाडी बाटोमै रोकिएका छन् ।
काठमाडौं महानगरपालिकाले जनाए अनुसार आइतबार ५५ वटा गाडी फोहोर फ्याँकेर फर्केकोमा आज भने अवरोध गरिएको छ ।
१७ वर्षदेखि काठमाडौं महानगरलगायत अन्य धेरै नगरपालिकाको फोहोर धादिङ र नुवाकोटको सिमाना सिसडोल र पछिल्लो समय बञ्चरेडाँडामा अव्यवस्थित तरिकाले फाल्दै आएको भन्दै उनीहरूले आक्रोश पोखेका छन् ।
काठमाडौं महानगरपालिकाका मेयर बालेन्द्र साहले भने बञ्चरेडाँडामा गलत कसरत हुँदै गरेको भन्दै गुनासो गरेका छन् । उनले सामाजिक सञ्जालमा लेखेका छन्, ‘दुई अवरोध हटाउनेबित्तिकै अर्को अवरोधको कसरत हुँदै गरेको भन्ने जानकारी पाएका छौं । वास्तवमै त्यो कसरत हो भने त्यो विडम्बनापूर्ण हुनेछ ।’
उनले बञ्चरेडाँडामा फोहोर व्यवस्थापनका लागि कतिपय संरचनाहरू बनिसकेको बताउँदै अब अर्को कुनै बहानामा अवरोध गर्न नहुने बताएका छन् । भूमि अधिग्रहण तथा संरचना निर्माण र प्रभावितहरूले पाउने सुविधा तथा मुआब्जा जस्ता काममा ५ अर्ब खर्च भइसकेको साहको भनाइ रहेको छ ।
