अर्थ जङ्ग शाही
बझाङ । बझाङमा सवारी दुर्घटनामा ज्यान गुमाएकी मृतकका आफन्तको प्रदर्शन गरेका छन् । जसका कारण जयपृथ्वी राजमार्ग अवरुद्ध भएको छ ।
धनगढीबाट बझाङ आउँदै गरेको मालबाहक ट्रक र मोटरसाइकल एकआपसमा ठोकिँदा दुर्गाथलि गाउँपालिका–३ रकैल घर भएकी २५ वर्षीया अमृता खत्रीको मृत्यु भएको हो ।
सोमबार बिहान सदरमुकाम चैनपुरदेखि बागथाला तर्फ गइरहेको सुपप्र ०१०१ ० प ५३१७ नम्बरको मोटरसाइकल र धनगढीबाट बझाङ आइरहेको सुपप्र ०१००१ ख ३०७१ नम्बरको ट्रक केदारस्युँ गाउँपालिका २ र ४ को बीच बज्वामा एकआपसमा ठोकिँदा मोटरसाइकल पछाडि सवार हेयर नेपालमा कार्यरत खत्रीको घटना स्थलमै मृत्यु भएको जिल्ला प्रहरी कार्यालय बझाङका सूचना अधिकारी रमेश अवस्थीले बताए ।
दुर्घटनापछि स्थानीय र मृतकका आफन्तले जयपृथ्वी राजमार्ग अवरुद्ध गरेका छन् । राजमार्ग अवरुद्ध गरेपछि जिल्लाबाट बाहिरिने र भित्रिने सवारीसाधन रोकिएका छन् । शव अहिलेसम्म उठाइएको छैन । मृतकका आफन्त र स्थानीयले मृत परिवारलाई क्षतिपूर्ति घटनाको सत्यतथ्य छानवीन र सवारी चालकलाई नियन्त्रणमा नलिएसम्म अवरुद्ध राजमार्ग नखोल्ने अडान राखेका छन् । सडक सुचारू गर्ने सहमतिको प्रयास भइरहेको प्रहरीले जनाएको छ ।
ट्रक चालक बैतडीको पुर्चौडि नगरपालिका–६ का दिपेन्द्र साउँदलाई नियन्त्रणमा लिएर अनुसन्धान थालिएको छ भने मोटरसाइकल चालक बझाङको जयपृथ्वी नगरपालिका–७ का नारायण जोशी फरार रहेका छन् । फरार जोशीको खोजी कार्य भइरहेको प्रहरीले जनाएको छ ।
खत्री संस्थाको फिल्ड कार्यक्रमका लागि बाग्थला जाने क्रममा दुर्घटनामा परेको प्रहरीले जनाएको छ । मृतक खत्रीका श्रीमान उत्तम धामी भने हाल भारतमा रहेको जिल्ला प्रहरी कार्यालय बझाङले जनाएको छ ।
